Кыргыз Республикасынын Улуттук коопсуздук мамлекеттик комитетинин генерал-лейтенанты А.К. Бакаев атындагы Академиясында 2026-жылдын 23-июнунда «Кыргыз Республикасындагы жана Борбордук Азиядагы диний абал, Жакынкы Чыгыштагы кырдаалдын Кыргызстандагы диний абалга таасири, тенденциялар жана болжолдор» темасына арналган илимий-практикалык конференция өттү. Иш-чарага алдыңкы илимий жана билим берүү мекемелеринин катышуучулары, ошондой эле мамлекеттик органдардын өкүлдөрү жана бул тармактагы эксперттер чогулушту.
Конференциянын негизги максаты Кыргызстандагы жана Борбордук Азиядагы диний абалга байланыштуу негизги маселелерди талкуулоо болду. Катышуучулар диний коопсуздукка, жаштар арасында экстремизмди алдын алууга жана санариптик чөйрөнүн коомдук жана диний көз караштарды калыптандырууга таасирине өзгөчө көңүл бөлүштү. Ошондой эле диний билим берүүнү өнүктүрүү аспектилери жана Жакынкы Чыгыштагы улантылып жаткан процесстер менен байланышкан тобокелдиктер талкууланды.