Баткен облусунда Кыргыз Республикасынын президентинин тапшырмасы боюнча эл менен болгон жолугушуулар аяктады. Бул тууралуу региондогу президенттин ыйгарым укуктуу өкүлүнүн маалымат кызматы билдирди. Ыйгарым укуктуу өкүл Мамыржан Рахимов үч райондо, үч шаарда жана 22 айылдык аймакта жарандардын кайрылууларын мамлекеттик органдардын өкүлдөрү менен биргеликте талкуулады.
Аяктоочу жолугушуу Лейлек районунун Жаңы-Жер айылдык аймагында болуп, 300дөн ашык катышуучуну чогултту. Тургундар 37 суроону көтөрүштү, алардын арасында чек арадагы кагылыштардан жабыркагандарга компенсациялык төлөмдөр, экинчи турак жай берүү жана социалдык маселелерди чечүү тууралуу суроолор болду. Чек арадагы айылдык аймакта 16 миңден ашык адам жашагандыктан, тургундардын маселелерине чоң көңүл бурулду.