Таразда, Казакстандын Жамбыл облусунда, Кыргызстандын ардактуу консуласынын офисинин ачылышы болду. Иш-чарага жогорку даражадагы коноктор катышты, алардын арасында Алматыдагы Кыргызстан Республикасынын башкы консуласы Женишбек Асанкулов, Тараз шаарынын акими Бахытжан Орынбеков жана ардактуу консул Жанузак Бейсеубаев, ошондой эле Талас жана Жамбыл облустарынан бизнесмендер болду. Жаңы консулдук офисинин ачылышы кыргыз-казак мамилелерин өнүктүрүүгө жана региондор аралык кызматташтыкты активдештирүүгө багытталган.
Иш-чаранын жүрүшүндө Тараз шаарынын акими Бахытжан Орынбеков Талас шаардык кеңешинин төрагасы Алибий Джуманов менен жолугушту. Иш-чаранын катышуучулары региондор арасындагы кызматташтыктын маанилүү аспекттерин, анын ичинде ишкерлер үчүн мүмкүнчүлүктөрдү жана соода-экономикалык байланыштарды өнүктүрүүнү талкуулашты. Тараздагы консулдук офисинин ачылышы эки мамлекеттин ортосундагы өнөктөштүктү бекемдөөгө маанилүү кадам катары каралууда.
Башкы консул Женишбек Асанкулов жаңы офис эки тараптуу мамилелерди жакшыртууга гана эмес, ошондой эле Кыргызстандыктарга жана бизнеске жардам көрсөтүүгө да жардам берет деген үмүтүн билдирди. Ал консулдуктун элдер ортосундагы достукту жана коңшулук мамилелерин тереңдетүү үчүн маанилүүлүгүн белгиледи.
Визиттин алкагында Талас облусунун бизнес өкүлдөрү Жамбыл облусунун экономикалык жана маданий потенциалы менен таанышышты, жергиликтүү ишканаларды, анын ичинде Dala Glass айнек өндүрүү заводун, ошондой эле Жамбыл облустук тарыхый-краеведческий музейин жана Кардиохирургия жана трансплантология боюнча илимий-клиникалык борборду зыярат кылышты.