Бишкек шаардык экология прокуратурасы Чолпон-Атадагы жана Ысык-Көл районундагы Бостери айылындагы туристтик объектилерде тазалоо курулмаларынын санитардык-коргоо зоналарын пайдаланууга байланыштуу экологиялык мыйзамдардын бузулушун аныктады. Текшерүүнүн натыйжасында райондук курулуш жана архитектура башкармалыгынын кызматкерлери бул зоналарда курулуш иштерин жүргүзүүгө уруксат берген курулуш жыйынтыктарын мыйзамсыз бергендиги белгилүү болду.
Аныкталган фактылар боюнча кызматтык абалынан кыянаттык менен пайдалануу боюнча Кыргыз Республикасынын Кылмыш-жаза кодексинин 337-беренеси боюнча кылмыш иши козголду. Азыркы учурда иштин бардык жагдайларын тактоо үчүн тергөө иштери улантылууда.