Бишкек шаардык патрулдук милиция кызматкерлери жүргүнчү ташуу коопсуздугун камсыздоо стандарттарын сактоо максатында автобустар базасында пландан тышкаркы текшерүү өткөрүштү. Рейд учурунда автобустарды рейс алдындагы текшерүүгө жана алардын техникалык абалын текшерүүгө жооптуу контролдук механиктер өз милдеттерин туура аткарбагандыгы аныкталды. Мажбурлуу текшерүүнүн ордуна алар жөн гана керектүү белгилерди коюп, автобустарды тиешелүү текшерүүсүз маршрутка чыгууга уруксат беришкен.
Текшерүүнүн жыйынтыгында эки контролдук механикке мыйзам бузуулар боюнча протоколдор түзүлүп, аларга жалпы 56 миң сомдук айыппул салынды. Мындан тышкары, УПСМ кызматкерлери айдоочулар менен Жол кыймылынын эрежелерин катуу сактоонун маанилүүлүгү жөнүндө сүйлөшүү жүргүзүшүп, алардын айдоочулук күбөлүктөрүнүн күчүндө экенин текшеришти.