Кыргыз театралдык искусствосунун жүз жылдыгына арналган чоң иш-чаралар 2 жана 3-ноябрда пландалган. Маданият министри Мирбек Мамбеталиев бул тууралуу «Ачык кабинет: жоопкерчилик аймагы» медиапроектиси алкагында Т. Абдумомунов атындагы Кыргыз улуттук академиялык драма театрынын жаңы техникалык жабдуулары менен таанышуу учурунда билдирди. Юбилейлик иш-чараларга даярдык активдүү уланууда жана тиешелүү план иштелип чыккан.
Министр Кыргыз мамлекеттик драма театрынын имараты 1970-жылы ишин баштаганын белгиледи. Үч жыл мурун бул жерде капиталдык ремонт жүргүзүлгөн, ал эми өткөн жылы үн жана жарык жабдуулары жаңыртылган. Натыйжада үн жана жарык сапаты кыйла жакшырган. Эми жарыкты башкаруу заманбап пульт менен жүргүзүлүп, театр кызматкерлеринин ишин жеңилдетти.