Суу ресурстары, айыл чарба жана кайра иштетүү өнөр жайы министрлигинин маалыматына ылайык, 110 миллиметр диаметри бар түтүктөрдү колдонуп, ички суу түтүктөрүнүн жети чакырымын тартуу иштери аяктады. Ошондой эле системанын иштеши үчүн зарыл болгон 11 кубометр көлөмдөгү темир-бетон кудуктар орнотулду.
Мындан тышкары, насос жабдыктарынын үзгүлтүксүз иштешин камсыз кылган 160 киловатт кубаттуулуктагы трансформатордук подстанция орнотулуп, пайдаланууга берилди. Жолдордун астынан суу түтүктөрүн коопсуз тартуу үчүн жалпы узундугу 30,4 метрди түзгөн атайын болот түтүктөрү орнотулду.
Курулуш аяктагандан кийин жаңы система Байтик айылынын тургундарын заманбап санитардык талаптарга жооп берген сапаттуу ичүүчү суу менен камсыздайт.