Саламаттыкты сактоо министрлигинин маалымат борборунун маалыматына ылайык, машыгуунун катышуучулары шарттуу инфекциялык оору чыккан учурдагы аракеттерди иштеп чыгышты. Программага коркунучту эрте аныктоо, ведомстволор аралык координация, эпидемияга каршы иш-чаралар, медициналык жардам көрсөтүү, лабораториялык диагностика жана кризистик коммуникация этаптары кирди.
Машыгуунун сценарийи эл аралык чоң иш-чара учурунда курч ичеги оорусунун жана белгисиз этиологиядагы учурлардын жарым-жартылай моделин камтыды. Практикалык бөлүгү Кырчын капчыгайында жана Ысык-Көл районундагы жалпы практикалык борбордун инфекциялык бөлүмүндө өткөрүлдү. Машыгуу аяктагандан кийин дебрифинг өтүп, адистер катышкан кызматтардын аракеттерин баалап, системанын күчтүү жактарын белгилеп, мындан аркы жакшыртуу үчүн багыттарды аныкташты.