АКШнын президенти Дональд Трамп 20-июлда Канададан келген бир катар товарларга жаңы бажы салыктарын киргизүү тууралуу жарлыкка кол койду. Ал бул чечимди Канада тараптан америкалык алкоголь ичимдиктерине, унааларга жана сүт азыктарына карата «дискриминациялык мамиле» менен түшүндүрдү.
Жарлыкка ылайык, Канададан импорттолгон ар кандай товарларга, анын ичинде вино, хоккей клюшкалары жана цемент үчүн 50% бажы салыгы киргизилет. Бул чечим Ак Үйдүн расмий сайтында жарыяланды.
Жаңы тарифтер 30 күндөн кийин, 19-августта күчүнө кирет жана энергия булактарына жана калий продукцияларына, ошондой эле мурдагы тармактык бажы салыктарына таасир этпейт. Бирок, алар АКШ, Мексика жана Канада ортосундагы эркин соода келишимине (USMCA) кирген товарларга жайылтылат. Трамп бул чаралар америкалык унаалардын экспортун жакшыртат деп үмүттөнүүдө.
АКШнын соода өкүлү Джеймисон Грир жаңы бажы салыктары Канададан импорттолгон 20 миллиард долларлык товарларга таасир этээрин белгиледи. Ал Канада америкалык алкоголь ичимдиктеринин кирүүсүн чектеп, Европалык Союздан келген сүт азыктарына кеңири мүмкүнчүлүк бергенин жана америкалык унаалардын экспортун чектегенин айтып, АКШ тараптан жооп чаралардын көрүлүшүнө себеп болгонун баса белгиледи.