Чолпон-Атада 27-июлда «Рух Ордо» маданий борборунда Өзбекстан маданият күндөрүнүн салтанаттуу ачылышы болду. Иш-чарага бийлик өкүлдөрү, искусство ишмерлери жана Ысык-Көл облусунун тургундары катышты. Окуянын максаты эки өлкө ортосундагы достукту бекемдөө жана маданий-гуманитардык кызматташтыкты өнүктүрүү, деп белгилешти Кыргызстандын Маданият, маалымат жана жаштар саясаты министрлигинде.
Иш-чарада эки өлкөнүн маданият министрлери — Мирбек Мамбеталиев жана Озодбек Назарбеков салтанаттуу сөз сүйлөштү. Алар бул окуянын Кыргызстан менен Өзбекстан ортосундагы чыгармачылык байланыштарды кеңейтүү жана маданий интеграция үчүн маанилүүлүгүн баса белгилешти.