Өзбек-Кыргыз өнүктүрүү фонду төрт жылдык ишмердүүлүгүндө экономикадагы ар кандай тармактарда 37 долбоорду бекиткен, алардын жалпы суммасы 100 миллиондон ашык АКШ долларын түзөт. Бул тууралуу фонддун башкармалыгынын төрагасы Азиз Аалиев «Кабар» агенттигине кыргыз-өзбек бизнес-форуму учурунда билдирген. Фонд энергия, транспорт, социалдык инициативалар сыяктуу тармактардагы долбоорлорду колдойт, ошондой эле Өзбекстандан жана башка өлкөлөрдөн Кыргызстанга техникаларды жеткирүү жана тигүү ишканаларын каржылайт.
Ишке ашырылган инициативалардын арасында 9 долбоор ийгиликтүү аякталып, алынган каражаттар толугу менен кайтарылган. Учурда фонд 11 жаңы долбоор үстүндө иштеп жатат, алардын жалпы баасы болжол менен 100 миллион АКШ долларын түзөт.