Кыргызстандын Түркиядагы элчиси Руслан Казакбаев Амасия провинциясында өткөн бизнес-форумга катышты. Бул форум Кыргызстандын көз карандысыздыгынын 35 жылдыгына жана Түркия менен дипломатиялык мамилелердин түзүлүшүнө арналган. Өз сөзүндө ал Түркиянын Кыргызстандын көз карандысыздыгын биринчи болуп тааныган өлкө катары маанилүүлүгүн белгилеп, түрк өнөктөштөрүнүн туруктуу колдоосуна ыраазычылык билдирди.
Элчи Кыргызстандын жана Түркиянын ортосундагы мамилелердин туруктуу өнүгүүсү, саясий байланыштардын үзгүлтүксүз жүргүзүлүшүнө негизделгенин, бул болсо стратегиялык өнөктөштүктү бекемдөөгө жана соода, экономика, инвестициялар, маданият жана билим берүү тармактарында кызматташууну кеңейтүүгө көмөктөшөрүн белгиледи.
Руслан Казакбаев визиттин алкагында Амасиянын Соода-өнөр жай палатасынын төрагасы Мурат Кырлангыч менен жана жергиликтүү бизнес коомчулугунун өкүлдөрү менен жолугушуу өткөрдү. Жолугушууда өз ара сооданы 5 миллиард долларга жеткирүү үчүн регион аралык кызматташтыктын мааниси талкууланды.
Элчи Кыргызстандын социалдык-экономикалык өнүгүүсү, инвестициялык климаты жана өлкөдө бизнес жүргүзүүнүн артыкчылыктары тууралуу маалымат берди. Талкуунун жүрүшүндө түрк бизнесинин өкүлдөрү биргелешкен инвестициялык долбоорлорго жана Кыргызстандын менен соода-экономикалык байланыштарды кеңейтүүгө кызыгуусун билдиришти.
Жолугушуунун жыйынтыгында тараптар эки өлкөнүн бизнес чөйрөлөрүнүн ортосундагы түз байланыштарды бекемдөөгө кызыкдар экенин жана өз ара бизнес-миссияларды уюштуруу, B2B форматында жолугушууларды өткөрүү жана биргелешкен инвестициялык демилгелерди иштеп чыгуу зарылдыгына көңүл бурушту.
Ошондой эле визит учурунда Руслан Казакбаев Амасия журналисттер ассоциациясынын жетекчилиги, Салоник шаарынан көчүп келгендер ассоциациясы, ишкерлер ассоциациясы жана туризм ассоциациясы менен жолугушуулар өткөрдү. Катышучулар кыргыз-турк байланыштарын, регион аралык кызматташтыкты жана маданият жана экономика тармактарында биргелешкен демилгелерди ишке ашыруу перспективаларын талкуулашты.