Кыргызстандын биринчи айымы Айгуль Жапарова Азербайжандын жана Өзбекстандын биринчи айымдары Мехрибан Алиева жана Зироат Мирзиёева менен бирге Чолпон-Атадагы «Алтын-Балалык» реабилитациялык борборун зыярат кылды. Бул тууралуу маалымат Айгуль Жапарованын социалдык тармактагы расмий баракчасында пайда болду. Борбордо жогорку конокторду гүлдөрдү тапшырып, тарбиячылар тосуп алышты.
Зыярат учурунда биринчи айымдар билим берүү боюнча мастер-класстар менен таанышып, балдар менен баарлашып, чыгармачылык иш-чараларга катышышты. Конокторго майда моторика жана логикалык ой жүгүртүүнү өнүктүрүүгө багытталган оюндар, ошондой эле робототехника жана башка заманбап билим берүү багыттары боюнча сабактар көрсөтүлдү.